கருப்பு

அங்கு ஒரு மரம்தான் இருந்தது
அம்மரத்தில்
ஒரு கிளைதான் இருந்தது
அக்கிளையில் ஒரு இலைதான் இருந்தது
அவ்விலை அருகே
ஒரு கருப்பு இருந்தது
தான் பறவையென்று
பறந்து காட்டியது
என்ன பறவை என்று
கரைந்து காட்டியது
இலை
போல் அசைந்தும் காட்டியது
சிலை
போல் இருந்தும் காட்டியது
ஏனோ
பார்த்தும் பார்க்காமலே போனான்
அந்த‌
புகைப்படக் கலைஞன்..

ஈ_ம்

அந்த ஊரில்
நாங்கள் வாழ்ந்தோம்
அதே ஊரில்
கொலைகளும்
படுகொலைகளும்
கண்ணீரும்
கதறல்களும்
வல்லுறவுகளும்
வல்லூறுகளும்
ரத்த வாய்க்கால்களும்
முள் வேலிகளும்
இன்னும் பிற‌
கோரங்களும்
வாழ்ந்தன‌
இன்று
அங்கு மீதமிருப்பது
கால் பரப்பிக் காத்திருக்கும்
காலமெனும் வேசை மட்டுமே

 

…..இப்படியாய்:

…..இப்படியாய்
…..இப்படியாய்
…..இப்படியாய்
…..இப்படியாய்
…..இப்படியாய்
எல்லாமும்
வழக்கொழிந்து போகும்
திரு நாளில்
இப்படியாய்:
சுழலத் தொடங்கும்
காலம்….

அவளின்றி...

வாழ்க்கை

மிக மிக‌

அருவருப்பாய் இருக்கிறது

உலகில் உள்ள‌

எல்லா விளக்குகளையும்

ஏற்றிய பின்னரும்

ஒழுகும் இரவு போல்

ஒழுகிக்கொண்டே இருக்கிறது

இந்த வலி

ஏமாற்றம் தான்...

அவள் மீதான‌

என் காதலில்

நூறில்

ஒரு பங்கு கூட இல்லை

இந்த‌ வ‌லி

அவ‌ளை ஸ்ப‌ரிசிக்காம‌ல்

உயிர‌ற்றுக் கிட‌க்கும்

இந்த‌ தேக‌ம்

ஒரு ம‌ல‌க் குவிய‌ல் போல்

துர்நாற்ற‌ம் கொள்கிற‌து...

காற்று

ம‌ட்டுமே

என் ப‌க்க‌ம்

வ‌ந்து போகிற‌து...

உட‌லென்னும்

புதைக்குழிக்குள்

உயிர்

சிக்கிக்கொண்டிருக்கிற‌து...

சாவுச் ச‌னிய‌னே

எங்கு தொலைந்தாய்

இல்லை...

என்னில்

இனி

சாவ‌த‌ற்கு

என்ன‌ மீத‌மிருக்கிற‌து!!!

எப்படியோ

எப்படியோ
ஆடு ஒன்று
பிறந்தது

எப்படியோ
ஒரு ஆடு
சட்டைப் போடக் கற்றுக்கொண்டது
ஒரு கலாச்சாரம் பிறந்தது

எப்படியோ
சட்டையில் இரு பித்தான்கள் தொலைந்தது
ஒரு கலாச்சாரம் பிறந்தது

எப்ப‌டியோ
ச‌ட்டையில் பித்தான்க‌ள் இல்லாம‌லான‌து
ஒரு க‌லாச்சார‌ம் பிற‌ந்த‌து

ம‌ழையிலோ
காற்றிலோ
எப்ப‌டியோ
ச‌ட்டையின் நிற‌ம் மாறிய‌து
ஒரு க‌லாச்சார‌ம் பிற‌ந்த‌து

எப்ப‌டியோ
ச‌ட்டை அவிழ்ந்து விழுந்த‌து

ஆடு பிற‌ந்த‌து

காற்று

பூந்தோட்டத்தின் வழியாக‌
வந்தக் காற்று
களைப்புற்றிருந்தது
ஒவ்வொரு பூவும்
ஒரு கவிதை சொல்லியிருக்கவேண்டும்
இல்லை
சொல்ல சொல்லியிருக்கவேண்டும்
பட படவென அடித்திருக்கும்
இலைகள்
பல கதைகள் சொல்லியிருக்கவேண்டும்
இல்லை
பல கேள்விகள் கேட்டிருக்க வேண்டும்
வண்ணத்துப் பூச்சிகளைப் பிடிக்கத்
துரத்தியிருக்க வேண்டும்
இல்லை
ஒவ்வொரு பூவின் மணத்தையும்
பிடித்திருக்கவேண்டும்

    ******
கடலை மொழிபெயர்த்துக்கொண்டிருந்த காற்று
மிகவும் களைப்புற்றிருந்தது..
எது கடல்?
அலைகளா?
அதன் ஓயாத சத்தமா?
ஆழமா?
அதன்
அதீத மெளனமா?
மீன்களா?
மீனவர்களா?
மழையா?
நீலமா?
நீளமா?
காற்று
மிகவும் களைப்புற்றிருந்தது..